Русский
English
Քննարկվում են սահմանամերձ Շվանիձոր, Նռնաձոր և Ալվանք բնակավայրերի համար ստորգետնյա ջրային գետնուղիների (Քյարիզներ) ջրհավաք ավազաններին լրացուցիչ ջրի սնուցում ապահովելու հնարավորությունները
2025 թ. մայիսի 27-ին Ջրային համակարգերի օգտագործման և պահպանության տեխնիկական հանձնաժողովի նախագահ, Ակադեմիկոս ԻՎԵղիազարովի անվան ջրային հիմնահարցերի և հիդրոտեխնիկայի ինստիտուտի գիտխորհրդի նախագահ, տեխնիկական գիտությունների դոկտոր, պրոֆեսոր Հովհաննես Թոքմաջյանի, Ջրային կոմիտեի մոնիթորինգի և վերլուծությունների վարչության պետ Վահագն Օհանջանյանի, Մեղրի համայնքի աշխատակազմի քաղաքաշինության, հողօգտագործման, գյուղատնտեսության և գույքի կառավարման բաժնի պետ Մկրտիչ Մկրտչյանի, Մեղրի համայնքի Շվանիձոր բնակավայրի վարչական ղեկավար Ալեքսան Թումանյանի, Շվանիձոր բնակավայրի բնակիչներ Հովհաննես Օհանյանի և Գրիգոր Հարությունյանի մասնակցությամբ ուսումնասիրվել է Մեղրի համայնքի Շվանիձոր, Նռնաձոր և Ալվանք բնակավայրերի ջրամատակարարման խնդիրները։ Իրականացված ուսումնասիրությունների և քննարկումների արդյունքում դիտարկվել են ջրամատակարարման խնդիրների լուծման հետևյալ տարբերակները
- Ներկայումս Մեղրի համայնքում քննարկվում է ՄԱԿ-ի պարենային անվտանգության ծրագրով մոտ 56 կմ ջրագծի կառուցման հնարավորությունը, որը սնվելու է Ծաղկանց Հովիտ գետից և հանդիսանալու է ջրաղբյուր Շվանիձոր, Նռնաձոր, Ալվանք, Վարդանի Ձոր, Թղկուտ, Լիճք և Տաշտուն բնակավայրերի անտառներին և բուսականությանը ջուր մատակարարելու համար։ Նշված ծրագրի իրականացումը ոչ միայն կկանխի անտառների և բուսական աշխարհի չորացումը, այլև կարող է ապահովել Շվանիձոր, Նռնաձոր և Ալվանք բնակավայրերի ստորգետնյա ջրային գետնուղիների (Քյարիզներ) ջրհավաք ավազանների լրացուցիչ սնուցումը։ Այն կարող է դառնալ նաև Վարդանի Ձոր և Թղկուտ բնակավայրերին խմելու ջրի մատակարարման աղբյուր։
Մեղրի համայնքի ներկայացուցչի կողմից տրամադրված տեղեկատվության համաձայն, ներկայումս Մեղրի համայնքում առկա է ՄԱԿ-ի պարենային անվտանգության ծրագրով տրամադրված 7 կմ խողովակաշար, իսկ համապատասխան նախագծանախահաշվային փաստաթղթերի առկայության պարագայում կտրամադրվի նաև խողովակների մնացած մասը։
- Լրացուցիչ ուսումնասիրության արդյունքում անհրաժեշտ է պարզել Տաշտուն գետից խմելու ջրի տեղափոխումը Մեղրի համայնքի մաքրման կայան և տարածքում լրացուցիչ ոռոգման ջրի ապահովման պարագայում դիտարկել Մեղրի համայնքի խմելու ջրագծից սնվող նոր ջրագծի կառուցման միջոցով՝ Շվանիձոր, Նռնաձոր և Ալվանք բնակավայրերին խմելու ջուր տրամադրելու հնարավորություն։
- Լիճքի ջրամբարի կառուցման աշխատանքներն ավարտելուց հետո օգտագործելով ջրամբարի հնարավորությունները, կարգավորելով ոռոգման ջրի խնդիրները, դիտարկել նաև ջրարբիացման և Շվանիձոր, Նռնաձոր և Ալվանք բնակավայրերի ստորգետնյա ջրային գետնուղիների ջրհավաք ավազանների (Քյարիզների) լրացուցիչ սնուցման հնարավորությունները։
- Մինչև անդրսահմանային տարածք ընկած հատվածում (Արաքս գետի հարակից տարածք)՝ Շվանիձոր բնակավայրից վար, գործարկել խորքային հոր՝ գոյություն ունեցող 1000 մ3 ծավալով ջրավազանի սնուցման համար և ջրավազանում կուտակված ջուրը օգտագործել ստորգետնյա ջրային գետնուղիների (Քյարիզների) ջրհավաք ավազանի սնուցման և խմելու ջրի մատակարարման նպատակով։
Վերոգրյալ տարբերակները ջրային համակարգերի օգտագործման և պահպանության տեխնիկական հանձնաժողովի նախագահ Հովհաննես Թոքմաջյանի և Ջրային կոմիտեի մոնիթորինգի և վերլուծությունների վարչության պետ Վահագն Օհանջանյանի մասնակցությամբ քննարկումներ են իրականացվել նաև Մեղրի համայնքի ղեկավար Խաչատուր Անդրեասյանի հետ։
Հաշվի առնելով այն հանգամանքը, որ նշված տարբերակները և առաջարկվող լուծումները խիստ նախնական են և հիմնված չեն տեղում իրականացված հետազոտությունների վրա հետևաբար Մեղրի համայնքի Շվանիձոր, Նռնաձոր և Ալվանք բնակավայրերի ջրամատակարարման խնդիրները առավել մանրամասն ուսումնասիրելու, մասնագիտական հետազոտություններ իրականացնելու և վերջնական լուծում տալու համար անհրաժեշտ է ներգրավվել մասնագիտացված խորհրդատվական կազմակերպություն, որը տեղում կիրականացնի հիդրոլոգիական, հիդրավլիկական, գեոդեզիական, երկրաբանական,ջրի որակի լաբորատոր փորձարկման և այլ անհրաժեշտ մասնագիտական հետազոտություններ, տեխնիկատնտեսական ուսումնասիրություններ, անհրաժեշտության դեպքում շրջակա միջավայրի վրա ազդեցության գնահատում և այդ արդյունքների վրա հիմնված ջրամատակարարման խնդիրների լուծման օպտիմալ տարբերակի ընտրություն և նախագծանախահաշվային փաստաթղթերի կազմման աշխատանքներ։ Խորհրդատվական կազմակերպությունը պետք է ուսումնասիրի նաև ջրամատակարարման ապահովման համար օրվա կարգավորիչ ջրավազանների, քլորակայանների կառուցման անհրաժեշտությունն ու նպատակահարմարությունը, ինչպես նաև ուսումնասիրի բնակավայրերի ջրամատակարարման ներքին ցանցերը և անհրաժեշտության պարագայում դրանք ներառի նախագծանախահաշվային փաստաթղթերում։
Տեխնիկական հանձնաժողովի մասնագետների մասնակցությունը կազմակերպվում է ՀՀ Ջրային կոմիտեի և Ակադեմիկոս Ի.Վ.Եղիազարովի անվան ջրային հիմնահարցերի և հիդրոտեխնիկայի ինստիտուտի միջև 29․11․2019թ․ կնքված համագործակցության հուշագրի հիման վրա՝ ինստիտուտի կողմից։
ՋՀՀԻ լրատվական բաժին